تذاكر الصيانة: العميل يعرف موبايله وصل لفين من غير ما يكلمك

الجهاز بيتساب مع ورقة صغيرة فيها اسم ورقم، والعربون بيتحط في الدرج من غير تسجيل، والعميل يكلمك كل يوم يسأل "خلص؟". وفي الآخر مفيش حد عارف الصيانة كسّبتك كام فعلاً.

في المقال ده هنشرح خطوة خطوة إزاي موبيلات بيتعامل مع الصيانة: من لحظة الاستلام لحد التسليم، وإيه اللي العميل بيشوفه، وإيه حدود الموضوع.

استلام الجهاز في ثواني

من شاشة الصيانة بتفتح تذكرة جديدة وتسجل:

• الجهاز والعطل.
• الـ IMEI والباسورد لو العميل إداهولك.
• العربون اللي استلمته.
• الفني اللي هيشتغل عليه.

لو أنت اللي بعت الموبايل ده، تاريخ البيع والضمان بيظهروا لوحدهم، فتعرف على طول الجهاز تحت الضمان ولا لأ.

متابعة الحالة

الجهاز بيمشي في 3 مراحل: اتستلم، في الصيانة، جاهز. كل ما تغيّر الحالة بتتسجل. وتقدر تدور على أي تذكرة برقمها أو برقم تليفون العميل، فمش محتاج تقلب في ورق.

قطع الغيار والأجرة

تضيف القطعة من مخزونك وتضيف أجرة الشغل. قطع الغيار ليها مخزون وتكلفة لوحدها ومش بتظهر في الكاشير العادي.

لو اضطريت تشتري القطعة مخصوص للشغلانة، تسجلها "اشتريتها للشغلانة": بتدخل مخزون قطع الغيار بتكلفتها، وتتسجل على حساب المورد أو تتدفع من الخزنة. ولو شلتها من التذكرة بتفضل في مخزونك.

التسليم والحساب

وقت التسليم العربون بيتخصم لوحده، والباقي العميل يدفعه كاش أو محفظة. التسليم بيتعامل زي بيعة عادية: القطعة بتطلع من المخزن، والفلوس تنزل الخزنة أو المحفظة، والفاتورة بتتعمل لوحدها، وكل التقارير بتشوفها.

ولو العميل رفض أو الجهاز ماينفعش يتصلح، تقفل التذكرة "رجع من غير إصلاح" وتكتب السبب. وبعدها ترجّع العربون من الخزنة أو تسيبه رصيد للعميل يشتري بيه حاجة بعدين.

العميل يتابع من غير ما يكلمك

لو شغّلت صفحة محلك، العميل بيدخل عليها ويكتب رقم التذكرة ورقم التليفون اللي سابه، ويشوف الحالة والميعاد المتوقع. التكلفة والقطع وبيانات العملاء التانيين عمرها ما بتظهر. ولو مش عايز الخاصية دي تقفلها من إعدادات الصفحة.

كمان فيه زرار واتساب برسالة جاهزة "جهازك جاهز" بالمبلغ المطلوب.

الفني والربح

الفني بيستلم ويصلّح ويسلّم ويحصّل من غير ما يشوف التكلفة ولا الربح، وممكن ياخد نسبة من الأجرة تدخل في المرتب. أنت بقى بتشوف على كل تذكرة الأجرة وهامش القطع وصافي الربح، بس لو معاك صلاحية التكلفة.

الحدود

• الـ IMEI بيتراجع على إنه 15 رقم صحيح بس، موبيلات مش بيفحص الجهاز عند أي جهة.
• الشغل أوفلاين مش مدعوم دلوقتي، محتاج إنترنت.

جرّب بنفسك من الصفحة التجريبية من غير تسجيل، أو شوف مميزات الصيانة. وكمان الأسعار وفيها 14 يوم تجربة مجانية.